Que necesita o municipio de Becerreá?

Novas: 

Fonte: 22/04/2013 - Francisco García / El Progreso (Becerreá)

ENQUISA
CARLOS FERNÁNDEZ, encargado de obras
«Hai que crear emprego e evitar que os mozos teñan que irse»

«O principal é manter a poboación e, se é posible, atraer novos veciños ao municipio. Para iso, hai que buscar fórmulas de crear emprego e evitar que os mozos teñan que irse a buscar traballo fóra de Becerreá. Creo que debe promocionarse o turismo rural, que está pouco presente neste municipio, creando máis rutas de sendeirismo, por exemplo. Tamén sería interesante promocionar a tenreira desta zona da Montaña, que ten unha gran calidade».

MIGUEL RIBADA, gerente dunha ferraxería
«É importante tomar medidas para dinamizar o comercio»

«Becerreá é o centro de servizos e comercio de varios municipios da comarca dos Ancares e iso hai que telo en conta de cara ao futuro. Terían que tomarse medidas para dinamizar o sector. Ademais de atraer aos habitantes doutros municipios próximos, para promocionar a vila sería importante aproveitar o potencial turístico da zona. Somos a porta dos Ancares e temos unha riqueza etnográfica que non está suficientemente aproveitada».

PAULA NOGUEIRA, estudiante de secundaria
«Deberían facer aquí as probas para o carné de conducir»

«A vila está bastante ben. Pensando no lecer, temos o polideportivo e hai xardíns para os máis pequenos. Talvez, bótase un pouco de menos unha piscina climatizada e algunhas outras cousas, pero o que máis me amola é ter que ir a Lugo para facer as prácticas do carné de conducir. En Becerreá, preparámonos para o teórico, pero para as prácticas temos que ir á capital e, ás veces, imos en autobús. Deberían facer as probas aquí».

CUCA GÓMEZ, taxista
«As estradas están en bastante mal estado, sobre todo a de Sarria»

«As estradas están en bastante mal estado, especialmente a que comunica Becerreá con Sarria, que está fatal, a pesar de que ten moita circulación de vehículos durante todo o día. En xeral, a rede viaria ao completo precisaría dun repaso en profundidade e dígoo porque, pola miña profesión, coñézoa ben. Por outra banda, tamén se necesitan máis infraestruturas de todos os tipos, empezando por unha piscina climatizada, por exemplo».

EVA PÉREZ, veterinaria
«Boto de menos máis actividades de tipo cultural e de lecer»

«Son galega, pero levo pouco tempo vivindo en Becerreá e o que máis boto de menos son actividades de carácter cultural e de lecer en xeral. Gústame moito o campo e, niso, en Becerreá hai onde elixir, pero tamén estaría ben que logo de traballar, houbese algo no que pasar o tempo, en lugar de ter que irse para casa ou a xogar a partida a un bar. Tamén me gustaría máis oferta para poder elixir, en canto ao comercio se refire».