Nun meu blogue adicado á toponimia da comarca dos Ancares fago varias alusións a uns poucos lugares onde, disque, andiveron os cabaleiros do Temple. Dun tempo a esta parte estou a recibir algúns correos no que me preguntan porque non amplío a información xa que a tradición da súa estadía pola comarca así o asegura. A todos lle respondo o mesmo: Que eu saiba, non existen probas nin documentais nin arqueolóxicas que certifiquen o feito (nin estudos que así o avalíen). Fálase de que andiveron por Penamaior; quizais si, a relación dos templarios coa orde do Císter é clara (véxase o panexírico do reformador da orde, Bernardo de Claraval, en favor deles, ou os mosteiros onde agocharon moitos cabaleiros despois da súa prohibición); tamén que o desaparecido mosteiro de Dorna, en Cervantes, pertenceu a esta orde monástico-militar (a estragada igrexa, único resto que se conserva, non me forneceu de ningunha nova neste sentido, nin por dentro nin por fóra). E está o famoso Graal que algúns identifican co que se custodia en Santa María a Real do Cebreiro (sobre este tema hai bastante literatura). Mais eu só atopo un lugar que, ao menos, si conserva algo deles: trátase do topónimo O Temple, aldea da parroquia de Padornelo, no concello de Pedrafita do Cebreiro. En varias ocasións falei con xente da zona, tentando acadar algún tipo de información, mais o resultado foi escaso. Tampouco atopei indicios materiais da súa presenza (se ben é certo que non é chegar e encher, unha investigación rigorosa conleva algo máis).
O motivo da introdución non é outro que o tentar recompilar máis información. Se alguén tivera algún dato referido a este tema agradeceríalle mo fixera saber, tanto por este medio como ao meu correo electrónico:
arqueoancares@gmail.com
Iniciar sesión
Rexistrarse
FAQ
Procurar
